Parabéns para Susana Sánchez!

XXI Premio nacional de poes�a Xosemar�a Pérez ParalléComo anunciaba no post precedente, onte viaxei a Fene en compañía do poeta Eduardo Estévez. O que non quixen dicir na altura foi que pretendía participar na reunión do xuri que determinou a gañadora do XXI Premio Nacional de Poesía Xosemaría Pérez Parallé.

Ás sete e media reunímonos, albergados pola directiva do C.M.I. Unidade de Fene, os xurados desta edición: Valentina Carro, gañadora da anterior edición, o amigo Rafa Vilar (que para algúns continúa a ser ‘Villar’) e máis eu. Sentamos, fornecemos as nosas propostas e reflectimos sobre a experiencia da lectura dos poemarios enviados. Non discutimos nada, pois un poemario resaltou nas mans dos tres membros do xuri ao mesmo tempo: era o libro enviado por Susana Sánchez, autora do blogue dedoscomovermes. Non tivemos dúbidas, eran os mellores poemas e, para a fortuna da boa poesía, a normativa do galego empregada non foi para ningún xurado un factor relevante. E o xuri é, conforme ás bases do premio, quen ten a potestade de as interpretar. Parabenizo por isto este xuri, así como os organizadores do premio.

Mais se todo o relatado acima foi satisfactorio, non menos agradábel foi participar no Obradoiro literario do Concello de Fene, comandado por Eduardo Estévez. Alí as participantes puxeron as súas creacións enriba da mesa para valoración común, nun ambiente de camaradaxe en que, sen faltar a sinceridade, as virtudes e os defectos dos textos eran resaltados para ilustración dos presentes. Neste contexto realizamos “cadáveres exquisitos” e outros exercicios poéticos como o que a seguir describo: despois de ter proposto unha palabra cada un de nós, o coordinador do experimento ordenou que nos puxésemos a escribir de modo automático e sen cesar, só freados para atender as palabras que nos ditaba a cada minuto (as previamente propostas por nós) e que debiamos con inmediatez incorporar ao discurso literario improvisado. As palabras desta sesión foron: elevar, laparoscopia, corrompida, espertar, saber, agora, rosmóns, rapaz. O texto que logrei facer foi o seguinte, no gozo relembrado dos experimentos poéticos nas noites herculinas dos noventa:

Como elevar o corpo
sobre o chumbo etéreo da tristeza?
Como elevarnos sobre o mar
abafante da melancolía?
Como elevar o espírito
ante a inminente
laparoscopia da alma?
Veñen os doutores agora
acariñar a triste corrompida,
escrava do noso corpo.
En silencio espertan ao delirio
os paxaros do outono,
sen saber que diminutas almas
florecen nas caves do pasado.
Agora, si, agora
ladremos como aqueles
aristocráticos rosmóns contra o destino.
Nada queremos dado.
Todo será tomado
polo espírito daquel rapaz
felizmente maleducado.

Alfredo Ferreiro

Share

by

Alfredo Ferreiro nasceu na Corunha em 1969. Estudou Filologia Hispânica e iniciou-se na Teoria da literatura. É membro da Asociación de Escritoras e Escritores en Lingua Galega e da Associaçom Galega da Língua. Tem participado desde 90 em inúmeros recitais de poesia e colaborado em revistas galegas e portuguesas, entre elas Anto e Saudade, sob a direção de António José Queiroz. Na atualidade é membro do Grupo Surrealista Galego. Como crítico tem colaborado em publicações periódicas impressas como A Nosa Terra, @narquista (revista dos ateneus libertários galegos), Protexta (suplemento literário de Tempos Novos), Dorna e Grial, para além de em diversos projetos digitais. De 2008 a 2014 dirigiu, junto com Táti Mancebo, a plataforma de blogues Blogaliza. Desde 2006 é asíduo dos meios eletrónicos, em que se dedica à divulgação da literatura e do pensamento crítico. Atualmente colabora no jornais Praza Pública e Sermos Galiza. A inícios de 2014 fundou, junto com Táti Mancebo e Ramiro Torres, a revista digital de artes e letras Palavra comum, dirigida ao âmbito lusófono. Desde outubro de 2015 é coodenador do Certame Manuel Murguía de Narracións Breves de Arteixo.

4 thoughts on “Parabéns para Susana Sánchez!

  1. Obrigadíssima polo bem que deixas o meu texto neste post.
    Eu também vos tenho em alta consideraçom, tanto às persoas que integrástedes o júri como à entidade organizadora do certame, por ter superado a questom normativa no momento de avaliar o texto.
    o bom sabor de boca que deixa sentir-se reconhecida é ainda mais agradável por isso.
    Agora, aguardar a publicaçom e que o mundo opine…

Comments are closed.