Premios do 30 aniversario do Certame de Narracións Breves Manuel Murguía

O pasado venres 14 de maio foi inaugurado o Paseo das Letras, plantouse unha nova árbore e celebrouse, da man do artista Xurxo Souto, a cerimonia de entrega duns premios que de novo aumentaron a contía

Premios Manuel Murguía 2021 - 016

Inauguración do Paseo das Letras

«As actividades de Arteixo no venres 14 de maio, na maior proximidade do Día das Letras dedicado a Xela Arias, comezaron ás 19:30 coa inauguración do Paseo das Letras, o que desde ese momento deixa ver, mediante placas de aceiro no chan da parte máis concorrida do paseo fluvial de Arteixo, os nomes de todas as persoas premiadas en trinta anos de Certame. A inauguración foi acompañada polos representantes dos partidos políticos do Concello de Arteixo, así como polo gaiteiro Óscar Miranda Lodeiros, quen interpretou o himno do Antigo Reino de Galiza.

Premios Manuel Murguía 2021 - 035

Nova árbore coa placa: “Na horizontal da terra / a vertical dos soños”

A continuación foi plantada unha nova árbore, como vén sendo habitual en cada aniversario, ao pé da cal reza a seguinte lenda: “Na horizontal da terra / a vertical dos soños”. Tal breve texto foi brevemente explicado ao público polo autor da proposta, o director literario do Certame, Alfredo Ferreiro Salgueiro. Este xesto ecolóxico contou coa interpretación a violín da peza “O pasodobre da Fraga” por Nuria Naya Riveiro.

Premios Manuel Murguía 2021 - 047

Xurxo Souto presentou o evento da entrega de premios

O evento de entrega de premios no Centro Cívico Cultural de Arteixo comezou perto das 20:30 e contou coa presentación do polifacético artista Xurxo Souto, quen non deixou de amenizar o acto coas súas dotes de contador de historias e de cantante sempre extasiado pola cultura popular. Tamén tiveron presenza os discursos dos coordinadores ou directores literarios do Certame do presente e do pasado: Henrique Rabuñal Corgo, quen falou dos inicios e da consolidación do Premio; Julio Mancebo Moreiras, quen mandou un texto lido por Xurxo Souto sobre os avances na súa etapa de coordinador; e Alfredo Ferreiro Salgueiro, quen recoñeceu o traballo dos seus predecesores, do Servizo de Cultura, do xurado de 2021, paritario na súa composición nos últimos anos e que conta coa colaboración permanente da Asociación de Escritoras e Escritores en Lingua galega e coa Asociación Galega da Crítica. Tampouco se deixou de agradecer a participación dos máis de 70 traballos recibidos no Certamen, nin a presenza do público a un acto que estaba a ser gravado integramente.

Na parte central do evento, entregáronse os premios segundo o ditame que Souto leu da correspondente acta asinada por Alejandro Mene Pazos, Beatriz Maceda Abeleira, Inmaculada Otero Varela e Alfredo Ferreiro Salgueiro, na que figuraban os nomes dos premiados:

Premios Manuel Murguía 2021 - 074

Gabriel Gómez Estévez (2º premio), Arancha Portabales Santomé (1º premio) e Cecilia Fernández Santomé (3º premio)

1º. María Aránzazu Portabales Santomé, polo relato Xanelas, presentado baixo o lema “Rosalía Pousada”, premiado con 4000 euros e a edición da obra.
2º. Gabriel Gómez Estévez, polo relato A caverna de Lara, presentado baixo o lema “Moura do Bosque”, premiado con 2000 euros e a edición da obra.
3º. Cecilia Fernández Santomé, polo relato As orfas daquel verán, presentado baixo o lema “Maggie Moon”, premiado con 1000 euros e a edición da obra.

Ademais dos premios, as persoas galardoadas recibiron unha peza escultórica de Dores Polo e Benito Freire, obra en miniatura e peza única que lembra outra maior dos mesmos autores situada no xardín da fachada do Centro Cívico Cultural, instalada en novembro pasado para inaugurar a conmemoración do Certame.

Premios Manuel Murguía 2021 - 071

Homenaxe sorpresa a José Manuel Piñeiro Balay

Deuse, por outra parte, unha sentida homenaxe sorpresa a José Manuel Piñeiro Balay, concelleiro de Cultura propulsor da creación deste certame no momento da súa creación, que consistiu na colocación dunha placa co seu nome nunha butaca do Auditorio e na entrega dunha peza conmemorativa, que agradeceu entre os aplausos de todos os presentes.

Premios Manuel Murguía 2021 - 075

Premiados, organización e participantes no evento

O evento contou coa intervención do Deputado de Cultura da Deputación da Coruña, Xurxo Couto Rodríguez, e foi oportunamente clausurado polo Alcalde de Arteixo, Carlos Calvelo Martínez, quen tivo o decoro de citar todas a persoas que nos 30 anos precedentes tiñan posibilitado o Certame, independentemente da súa función ou ideoloxía. En todo momento unha pantalla estivo mostrando os nomes gañadores e os nomes dos xurados no fondo do escenario, para que non esquecésemos que o prestixio que o Certame de Narracións Breves Manuel Murguía foi erguido co traballo e o talento de moitas persoas, como acontece con todo que ten valor autenticamente humano en calquera tempo e lugar.

Contacto: Alfredo Ferreiro Salgueiro (609 653 176)
Director literario do Certame de Narracións Breves Manuel Murguía de Arteixo

Cf. Concello de Arteixo

Share
30 Certame Manuel Murguia 2021 logo

“O certame está nun dos seus mellores momentos, temos arredor de 70 obras”

“É moi libertario, porque a normativa escrita do galego nunca se cuestiona”

Agradezo de corazón a entrevista de Iván Aguiar, de La Opinión A Coruña, sobre a entrega de premios que celebramos hoxe en Arteixo. Especialmente nunha época en que os medios están case desaparecidos para as noticias culturais non comerciais.

*

«A organización do Certame de Narracións Breves Manuel Murguía do Concello de Arteixo anunciou os finalistas deste ano tras admitir 70 traballos e xa prepara a cerimonia de entrega de premios, que se celebrará o próximo 14 de maio, cando será confirmado o gañador. O acto contará coa actuación musical de Xurxo Souto, quen ademais conducirá o acto. O evento incluirá tamén unha lembranza da figura de Xela Arias, escritora homenaxeada este ano no Día das Letras Galegas. Esta é a trixésima edición. O coordinador, Alfredo Ferreiro, analiza a situación deste concurso literario.

Leva cinco anos como coordinador do certame Manuel Murguía, que valoración fai do seu traballo neste tempo?

Alfredo Ferreiro Salgueiro ~ Maio 2021

Eu chego a un premio que leva 25 anos de percorrido. É un privilexio chegar a algo tan consolidado que está funcionando como unha maquinaria precisa. Eu chego coa intención de aportar algunhas cousas. Aportei ideas para facer un evento de entrega de premios máis dinámico. Antes era un evento máis tradicional e agora é máis gala. Unha cousa que si propuxen e se me fixo caso é a composición do xurado. Eu propuxen que un dos membros do xurado fose da Asociación Galega da Crítica, de tal modo que houbese una colaboración dunha asociación de escritores e de críticos. Para que houbese máis pluralidade. Ademais do xurado, dos catro somos un xurado paritario.

En que situación está o certame, que chega á edición número 30?

Nos últimos anos subiu a contía dos premios e este ano volveu subir. Se non recorda mal, son 4.000 euros para o primeiro, 2.000 para o segundo e 1.000 para o terceiro. Co cal hai unha aposta por animar aos autores e coñecer o seu traballo.

Está o certame no seu mellor momento?

Dende logo está nun dos seus mellores momentos. Nós temos habitualmente arredor de 70 obras. Está moi ben dotado. Ten unha gran traxectoria. Ter esta dotación económica, publicar nunha colección como Galaxia, ter un xurado de calidade, uns bos premios e o prestixio de 30 anos… a min me parece que non é fácil de conseguir. Dende logo este certame é dos máis antigos.

Hai marxe de mellora?

Sempre hai marxe de mellora. Dende logo que si. O que pode aportar un premio consolidado con 30 anos é difícil que o poida aportar un que leva dous anos polo prestixio que ten. O prestixio non se pode comprar cunha fórmula nova. Ese é un traballo de tempo.

Diría que o Manuel Murguía é un dos premios máis prestixiosos de Galicia?

Sen duda algunha. Estivo moi ben planteado dende o principio. Ademais ten outra cualidade. É realmente moi libertario. É un certame absolutamente literario, porque a normativa escrita do galego nunca se cuestiona, é dicir, aquí se publica na normativa que se mande. Pode ser algo que para moitos está identificado como portugués, como galego-portugués, como galego e outros que simplemente poderían chamarse normativa oficial. Hai liberdade absoluta dende a súa fundación. E se mantén. Para min é un dos estandartes do premio que o que demostra é que aquí nos fixamos na cuestión literaria, non estamos facendo política lingüística. Ese é outra batalla, outra batalla respectable e que non digo que non sexa importante. A lingua é importante. Sen literatura non se dignifica a lingua. Non é esa cuestión de lingua e literatura. Isto é esencialmente literario.

E ademais aporta diversidade.

Xente do reintegracionismo é habitual nos premios.»

*

Cf. La Opinión A Coruña

Cf. O certame Manuel Murguía prepara a entrega de premios tras dar a coñecer os finalistas

Share

Presentación do libro “A secreta melancolía da garza” e Bases do 29º Certame de Narracións Breves Manuel Murguía de Arteixo

14 de novembro, xoves, no auditorio do Centro Cívico e Cultural ás 20:00 hs.

Arredor do libro, colectánea dos relatos vencedores nos tres últimos anos do Certame, será establecida unha tertulia pública que contará coa presenza de José António Lozano, Mercedes Leobalde e Tiago Alves Costa, persoas gañadoras dos últimos tres anos, do Alcalde de Arteixo, Carlos Calvelo, do deputado de Cultura da Deputación da Coruña Xurxo Couto e do escritor Xavier Alcalá, que representará á Editorial Galaxia.

No mesmo acto, o director literario do Certame, Alfredo Ferreiro e o Alcalde de Arteixo, Carlos Calvelo, farán públicas as bases da 29ª edición do Certame.

Share

Premiados no Certame de Narracións Breves Manuel Murguía de Arteixo

O pasado xoves 9 de maio, celebrouse a cerimonia de entrega de premios ás 20:00 no Centro Cívico e Cultural de Arteixo e contou coa actuación de Quico Cadaval e Celso F. Sanmartín, ademais de cunha representación do xurado e varias personalidades institucionais

Foto: Dirección Xeral de Política Lingüística

O xurado composto por Charo Pita Villares (gañadora da 27ª edición), Inmaculada Otero Varela (representante da Asociación Galega da Crítica), Xabier López López (representante da Asociación de Escritoras e Escritores en Lingua Galega) e Alfredo Ferreiro Salgueiro (coordinador literario, que asistiu como secretario, con voz e sen voto), reunido o pasado 27 de abril, decidiu por maioría conceder os tres premios ás seguintes obras:

1º. A casa das Castrouteiro, de Daniel Barral Calvo

2º. A idade do escarnio, de Tito Pérez Pérez

3º. Crónica de ningures, de Francisco Rozados Rivas

De todos os relatos recibidos, case setenta foran admitidos a concurso por cumpriren estritamente as bases.

A coordinación agradeceu un ano máis a presenza no xurado dun membro da Asociación de Escritoras e Escritores en Lingua Galega, así como outro da Asociación Galega da Crítica, feito que contribúe a alicerzar o rigor do Certame no contexto sistema literario galego. Entregaron os premios Ana Bello Vázquez, concelleira de Cultura e Festas, Valentín García Gómez, Secretario xeral de Política Lingüística da Xunta de Galicia e Carlos Calvelo Martínez, alcalde do Concello de Arteixo.

Foto: Graciela Rabuña

O acto de entrega, presentado por Alfredo Ferreiro, ofreceu ademais a actuación Quico Cadaval e Celso F. Sanmartín, co seu espectáculo “Os contos de Joselín” e unha lembranza de Antón Fraguas, escritor homenaxeado este ano no Día das Letras Galegas. En canto á ambientación da gala, o Servizo Municipal de Cultura e Festas, comandado por Sonia Iglesias, deseñou unha recreación libre da casa en que naceu Manuel Murguía, no Froxel, contando coas artes florais de Richar del Toro e a profesionalidade habitual do equipo técnico do auditorio. Rematado o acto, ofreceuse un viño de honra como fin de festa.

Cf: arteixo.org

Share

Finalistas do 28º Certame de Narracións Breves Manuel Murguía de Arteixo

A cerimonia de entrega de premios celebrarase o próximo 9 de maio, xoves, ás 20:00 no Centro Cívico e Cultural de Arteixo, e contará coa actuación de Quico Cadaval e Celso F. Sanmartín.

O xurado composto por Charo Pita Villares (gañadora da 27ª edición), Inmaculada Otero Varela (representante da Asociación Galega da Crítica), Xabier López López (representante da Asociación de Escritoras e Escritores en Lingua Galega) e Alfredo Ferreiro Salgueiro (coordinador literario, que asistiu como secretario, con voz e sen voto), reunido o pasado 27 de abril, decidiu por maioría conceder os tres premios ás seguintes obras finalistas (por orde alfabética de autor):

A casa das Castrouteiro, de Daniel Barral Calvo

Crónica de ningures, de Francisco Rozados Rivas

A idade do escarnio, de Tito Pérez Pérez

O Certame de Arteixo acrecenta en 2019 a dotación dos premios en máis 1.300 euros, ofrecendo 4.000 € para o primeiro, 1.500 € para o segundo e 600 € para o terceiro, ademais da publicación da obra nun volume colectivo.

Read More
Share

O Certame de Narracións Breves Manuel Murguía acrecenta o seu valor en 2019

O prazo terminará o 15 de febreiro

O Certame de Narracións Breves Manuel Murguía de Arteixo [cf. em português], coordinado por cuarto ano por Alfredo Ferreiro Salgueiro, atinxirá en 2019 a 29ª edición, acrecentando nesta ocasión o valor dos premios en máis 1.100 euros.

Resumo das Bases (cf. documento oficial):

Os relatos [entre 15 e 30 páxinas] deben ser orixinais e inéditos (non publicitados por ningún medio, físico nin dixital) escritos en lingua galega, enviados con pseudónimo e só contendo os datos persoais nun sobre fechado antes do 15 de febreiro de 2019″.

Os premios: O primeiro, de 4.000,00 €; o segundo, de 1.500,00 €; e o terceiro, de 600,00 €, todos eles sometidos á correspondente retención. Cando se estimar oportuno, serán publicados nunha edición colectiva.

O Certame conta ano tras ano coa colaboración da Asociación de Escritoras e Escritores en Lingua Galega así como, desde 2017, coa da Asociación Galega da Crítica, tanto na selección dos xurados como na asesoría sobre cuestións técnico-literarias.

Información: Para dúbidas pode telefonar ao 981 659 100 do Centro Cívico Cultural ou escribir a cultura@arteixo.org.

Lembrade, autor@s en galego de todo o mundo, que este premio avoga pola tolerancia gráfica desde a súa fundación, o que garante a liberdade creativa e a ausencia de criterios político-lingüísticos na valorización das obras presentadas. Esta actitude socialmente inclusiva do punto de vista lingüístico é algo que nos orgulla especialmente e gustábamos fose un exemplo a seguir por todos os premios literarios do país.

Alfredo Ferreiro Salgueiro, coordinador literario

*

Vídeos de 2018:

Share
Premios Xerais 2018 por Alfredo Ferreiro

Premios Xerais 2018

Mais unha vez tivemos a honra de colaborar coa comunicación dixital dos Premios de Edicións Xerais, este ano celebrados no Museo do Mar de Galicia baixo a batuta sempre tan eficiente de Celia Torres. Nunha gala que mudou completamente de formato respecto a aquela romaría que nos regalaban na Illa de San Simón, a editora asumiu os retos do presente coa creatividade e a profesionalidade de sempre, recoñecendo o traballo feito e comprometéndose de novo coa cultura do país e en particular coa edición de libro en galego.

Neste marco, no evento mostrouse un cariñoso agradecemento a Manuel Bragado, que recentemente cedeu o posto de director xeral a Fran Alonso, e articulouse á volta da entrevista que Teresa Cuíñas (cf. vídeo do evento transmitido ao vivo) realizou aos premiados.

Estes foron os vídeos que improvisamos alí coas protagonistas, minutos antes do acto público:

Previamente á gala no Museo do mar, houbemos de facer unhas entrevistas a tres improvisadas Booktubers sobre as obras gañadoras:

Este ano teño que agradecer de novo a colaboración do mestre do “ollo de vidro” Aser Orbán, con quen sempre traballar resulta unha actividade fácil e divertida.

Share